Tofiq Mehdiyev

Tofiq Mehdiyev — tibb üzrə elmlər doktoru, Azərbaycan Respublikasının əməkdar həkimi, Şəki Rayon Mərkəzi Xəstəxanasının terapiya şöbəsinin məsləhətçi həkim-endokrinoloqu, Şəkidəki “Alyans” klinikasının endokrinoloqu, Azərbaycan Dövlət Pedaqoji Universitetinin Şəki filialının baş müəllimi.

Tofiq Mehdiyev
Mehdiyev Tofiq Vahid oğlu
Tofiq Mehdiyev.
Doğum tarixi	27 oktyabr 1953 (1953-10-27)
Doğum yeri	Qoxmuq, Nuxa (indiki Şəki) rayonunun, Azərbaycan SSR, SSRİ
Vətəndaşlıq	SSRİ→ Azərbaycan
Elmi dərəcəsi	tibb üzrə elmlər doktoru
Təhsili	• Nəriman Nərimanov adına Azərbaycan Tibb İnstitutu, müalicə-profilaktika fakültəsi (1970–1976)  • Bakı şəhər 4 saylı Kliniki Xəstəxana, terapiya ixtisası üzrə internatura kursu (1976)
Atası	Vahid Mehdiyev
Mükafatları
facebook səhifəsi

Haqqında məlumatlar

27 oktyabr 1953-cü il tarixdə Nuxa (indiki Şəki) rayonunun Qoxmuq kəndində, ziyalı ailəsində anadan olub.

Təhsili

1970-ci ildə Şəki şəhər M.Qorki adına 10 №-li orta məktəbini bitirib.

1970 – 1976-cı illərdə Nəriman Nərimanov adına Azərbaycan Tibb İnstitutunun müalicə-profilaktika fakültəsində təhsil alıb.

1976-cı ildə Bakı şəhər 4 saylı Kliniki Xəstəxanada terapiya ixtisası üzrə internatura kursu keçib.

Əmək fəaliyyəti

1977 – 1980-ci illərdə Bakı şəhər 12 saylı xəstəxanada həkim-terapevt,

1980-cı ildən Şəki Mərkəzi Rayon Xəstəxanasında həkim-terapevt işləyib. Sonra Şəki Rayonlararası Endokrinoloji Dispanserində əvvəlcə həkim-endokrinoloq,

1984 – 2010-cu illərdə baş həkim,

2010 – 2020-ci illərdə isə şöbə müdiri vəzifəsində çalışıb.

2020-ci ildən Şəki Rayon Mərkəzi Xəstəxanasının terapiya şöbəsində məsləhətçi həkim-endokrinoloq, eyni zamanda Alyans klinikada endokrinoloq vəzifəsində çalışır.

Pedaqoji fəaliyyəti

1977 – 1980-ci illərdə Nəriman Nərimanov adına Azərbaycan Tibb İnstitutunun yoluxucu xəstəliklər kafedrasında,

1994 – 2000-ci illərdə M.Ə.Rəsulzadə adına Bakı Dövlət Universitetinin Şəki filialında,

2000 – 2015-ci illərdə Azərbaycan Müəllimlər İnstitutunun Şəki filialında müəllim işləyib.

2015-ci ildən Azərbaycan Dövlət Pedaqoji Universitetinin Şəki filialında baş müəllim vəzifəsində çalışır.

Elmi fəaliyyəti

1995-ci ildə “Şəkərli diabetli xəstələrdə trofiki xora və qanqrenanın kompleks müalicəsi” mövzusunda namizədlik,

2015-ci ildə “Şəkərli diabet fonunda inkişaf edən erektil disfunksiyanın ikincili profilaktikası və müalicəsinin müasir prinsipləri” mövzusunda doktorluq dissertasiyasını müdafiə edib.

7 monoqrafiya, 5 metodik tövsiyə, 80-dan artıq elmi məqalənin müəllifidir. 20-dən artıq elmi məqaləsi müxtəlif xarici ölkələrdə (Amerika, Almaniya, İngiltərə, Türkiyə, Rusiya və s.) çap olunub.

Kitabları

• Endemik ur və yod problemi/T.V.Mehdiyev; Elmi red: M.Ə.Ələkbərov. B.: Təbib, 1999. 216 s.

Təltif və mükafatları

• “SSRİ Səhiyyə Əlaçısı” döş nişanı (1990);
• “Azərbaycan Respublikasının əməkdar həkimi” fəxri adı (2000).

Digər

Azərbaycanda nəşr olunan “Metabolizm” və “Urologiya və reproduktiv təbabət” jurnallarının və Rusiya Federasiyasında nəşr olunan “Kurotnaya meditsina” (rus.: “Курортная медицина”) jurnalının redaksiya heyətinin üzvüdür.

2014-cü ildə Səhiyyə Nazirliyinin nəzdində fəaliyyət göstərən Sertifikasiya Komissiyasında endokrinologiya ixtisası üzrə imtahan verərək maksimal qiymət - 100 bal toplamışdır.

Ədəbiyyat

1. Azərbaycan Respublikasının səhiyyə işçilərinə fəxri adların verilməsi haqqında Azərbaycan Respublikası Prezidentinin fərmanı : [arx. 5 Sep 2018 - 7 Sep 2018] // E-qanun.az. — 2000. — 2 noyabr. — Müraciət tarixi: 05.02.2022.
2. Məmmədov Ə., Xalıqov F. Mehdiyev Tofiq // Şəki: Alim və ziyalılar. — Bakı: Bakı Universiteti Nəşriyyatı, 2002. — 2 cilddə. — I  cild. — Səhifələrin sayı:  582. — Səh.: 410-412. — 1.000 nüsx.